नियतै बिगार्ने, नियत मन पर्यो
मेरो औकात फेर्ने, ताकत मन पर्यो
धन नभए के भो ? धनी अनुभब छ
मसितको तिम्रो सङगत मन पर्यो
निधारमा हत्केला, शीर काखमा तिम्रो
बेहोसी हुँदाको हालत मन पर्यो
मायामा पनि त दूरी भैरहन्छ
अंगालोले बाँध्ने हिम्मत मन पर्यो
खतहरु छोपिए अनुहार भरिका
ओठले गरेका दस्त्खत मन पर्यो
एक्लै हिँड्दा खेरि सिढी समेत ठाडो
हामीले उक्लेको पर्बत मन पर्यो
तिमीसित हिड्दा यात्रा बेग्लै रह्यो
तिर्खा लाग्दा दिने राहत मन पर्यो ।
पेसाले दन्तचिकित्सक भएपनि जीवनका अन्तरङ्गहरूको शल्यक्रिया गर्न निकै खप्पीस छन् मवि सिंह आफ्ना गजलमा । अमेरिकी सङ्घर्षमय जीवनमा खर्च हुने उर्जालाई जोगाएर गजल विधामा लगानी गर्दै आएका मवि दन्त चिकित्साशास्त्र (Tufts University School of Dental Medicine, Boston, US) का सह प्राध्यापक पनि हुन् ।
मबि नेपाली गजल डटकमका संस्थापक सम्पादक हुन् ।