50 नेपाली गजल - Nepali Ghazal
  • धुवाँ देखिन्छ आगो देखिन्न कस्तो अचम्म !

लेखकःआनन्द श्रेष्ठ 597 पटक पढिएको:

धुवाँ देखिन्छ आगो देखिन्न कस्तो अचम्म !
मनमा लुकेको कालो देखिन्न कस्तो अचम्म !

गाउँ खाली छ शहर शून्य भो युवा भेटिन्न
जता हेरे नि पाको देखिन्न कस्तो अचम्म !

आज पुरानो मेरो शहरको नक्सा जाँच्दै छु 
नक्साबमोजिम बाटो देखिन्न कस्तो अचम्म !

माया गर्नेको आँखै टालिन्छ जस्तो लाग्दछ
बाङ्गो सोचिन्न खाल्डो देखिन्न कस्तो अचम्म !

डाँडाकाँडा 'थ्यो सम्झी ल्याउँदा हुन्छ रमाइलो
याद अल्झेको पाखो देखिन्न कस्तो अचम्म !

आनन्द श्रेष्ठ

आनन्द श्रेष्ठको जन्म चितवन जिल्लाको भरतपुर नगरपालिका वडा नं. ४ बाह्रघरेमा २०२५ सालको माघ महिनामा भएको हो । २०४२ सालमा एस.एल.सी. परिक्षा दिए पछि पोखरामा केही समय बिताएर २०४३ सालदेखि २०४६ सालसम्म पुल्चोक ईञ्जिनियरिङ्ग कलेजमा डिप्लोमा ईन सिभिल ईञ्जिनियरिङ्ग अध्ययन पुरा गर्नुभयो । खानेपानी संस्थानमा स्थायी जागिरे भएको २१ वर्ष भयो र दुई पदोन्नती पछि प्राविधिक अधिकृत भए पनि ईञ्जिनियर सो सरह हुनुभएकोछ ।

२०४५ सालमा दशरथ रंगशालामा भएको भिषण असिना पानी पछिको दुर्घटनाबाट आहत भएर एउटा कविता लेखी कलेजको कविता प्रतियोगितामा भाग लिएपछि साहित्यिक यात्राको पहिलो खुड्किलो चढ्नुभएका श्रेष्ठ त्यसपछि र जागिरे सिलसिलामा रसुवा, नुवाकोट, धुन्चे, ठमेल र सामाखुशीले थुप्रै कविताहरुको श्रृजना गरे पनि गजलमा निकै पछि अर्थात करिब ५ महिना अघि मात्र लाग्नु भएको हो यो क्षेत्रमा ।