26 नेपाली गजल - Nepali Ghazal
  • छाती भित्र घाउ उस्तै उदास-उदास आँखा होलान्

लेखकःअनन्त लम्साल 815 पटक पढिएको:

छाती भित्र घाउ उस्तै उदास-उदास आँखा होलान् 
आँधी जस्तै यी सुस्केरा पक्कै मेरा बा’का होलान्

बा’का स्वप्न कुल्ची हिँड्दा थाहा थे’न बुझेँ आज 
भन्नुहुन्थ्यो ‘बाबु भोलि तेरा पनि छोरा होलान्’

मेरो झुप्रो जलाईँदैमा बदलिन्न मुलुक सरकार 
उही एक-दुई छिमेकीका घर-आँगन उज्याला होलान् 

आफू हिँड्ने बाटो मैले आफैँ कोरी हिँडेपछि , 
मेरो बदनाम गर्दै हिँड्ने तिनै कथित द्यौता होलान् 

धज्जी काड्नु पहिले नै सोच्ने गर्दे ए गरिबी
यिनका कोही रानी होलान् यी कसैका राजा होलान् !

अनन्त लम्साल

जन्म : २०४१ भाद्र २०, बागेश्वरी ४ , नुवाकोट

साहित्यमा सानै देखि रुची । बिद्यालयकालदेखि नै प्रमुख रुचीको बिषय साहित्य । गजलमा रुची पुरानै हो, अलिअलि आफ्नै तरिकाले अरुको हेरेर यसरी रहेछ भन्ने बिचारेर लेख्नन प्रारम्भ। जब गजलको नियम, परिधी अलि-अलि यिनै सोसियल साईटहरुबाट बिभिन्न बरिष्ठ गजलकारहरुबाट थाहा पाएर अघि बढेको ।